Sálfræðiþjónusta Janusar með hópmeðferðir

Sálfræðiþjónusta Janusar endurhæfingar býður upp á tvær hópmeðferðir fyrir þátttakendur sína núna í byrjun febrúar 2012

1.    Hópmeðferðin  „Að lifa með kvíða“ og byggir á Acceptance and Commitment therapy (ACT) og er nýjung á Íslandi. Hún hefst fimmtudaginn 2. febrúar kl. 10:30-12:30. ACT kennir að það er í lagi að finna fyrir óæskilegum, óþægilegum hugsunum og tilfinningum í líkamanum. Þátttakendur læra að fylgjast með þeim án þess að leggja á þær dóma og frekar en að berjast við þessar hugsanir og tilfinningar læra þátttakendur nýjar leiðir til að takast á við þær. Markmið þessa meðferðarforms er að hjálpa þátttakendum við að sættast við eigin hugsanir, tilfinningar og líkamleg einkenni sem vekja upp kvíða frekar en að forðast þær og að auka færni í að takast á við áhyggjur vegna kvíða og ótta með árvekni og á mildan hátt (mindfulness). Jafnframt læra þátttakendur að þekkja gildi sín og eru studdir í að gera það sem samræmist gildum þeirra og markmiðum í lífinu. Hópmeðferðin fer fram í 10 manna hóp sem hittist einu sinni í viku í húsnæði Janusar Skúlagötu 19, 4ju hæð.  Það verður undir stjórn sálfræðinga Janusar endurhæfingar, Halldóru B. Bergmann og

2.    Hópmeðferð við félagsfælni hefst þriðjudaginn 7. febrúar kl. 14:00-16:00. Um er að ræða 10 vikur þar sem unnið er markvisst að því að draga úr kvíða og óöryggi í félagslegum aðstæðum og í samskiptum við aðra með aðferðum Hugrænnar Atferlismeðferðar (HAM).  Markmiðið er að þátttakandinn læri leiðir til að draga úr kvíða innan um aðra. Kenndar eru aðferðir í samskiptum þannig að hann geti gert það sem hann langar til og fær aðstoð við að auka sjálfstraustið. Hópmeðferðin fer fram í 8-10 manna hóp sem hittist einu sinni í viku í húsnæði Janusar Skúlagötu 19, 4ju hæð.  Það verður undir stjórn sálfræðinga Janusar endurhæfingar,  og Sigurðar Viðars. Hópmeðferðin er undirbúin í samvinnu við sálfræðinga Kvíðameðferðarstöðvarinnar sem hafa áralanga reynslu í hópmeðferð við félagsfælni sem borið hefur góðan árangur.

Kostir við hópmeðferð eru m.a.  að þátttakandinn  kynnist öðrum með sama vanda. Hann upplifir sig þar af leiðandi ekki eins einan og fær tækifæri til að læra af reynslu annarra og aðrir um leið tækifæri til að læra af honum ásamt því að þátttakendur fá stuðning og hvatningu hver frá öðrum.

Nýr starfsmaður

Sigrún Ólafsdóttir iðjuþjálfi hefur hafið störf hjá Janusi endurhæfingu. Um leið og við bjóðum hana velkomna til starfa væntum við mikils af störfum hennar í framtíðinni.